बीड जिल्हा कारागृह पुन्हा एकदा चर्चेत आलं आहे. काही दिवसांपूर्वी मस्साजोगचे सरपंच संतोष देशमुख यांच्या हत्येप्रकरणातील मुख्य आरोपी वाल्मीक कराड आणि त्याच्या टोळीच्या तुरुंगातील गँगवॉरची घटना ताजी असतानाच आता आणखी एक धक्कादायक प्रकार समोर आला आहे.
कारागृहात बंद असलेल्या एका न्यायालयीन आरोपीकडून गांजासदृश पदार्थ जप्त करण्यात आला आहे. या घटनेमुळे कारागृहात काय सुरक्षाव्यवस्था आहे, गांजासारख्या पदार्थांची आत प्रवेश कसा होतोय, यावर प्रश्नचिन्ह निर्माण झालं आहे.
झडती दरम्यान अंडरविअरमध्ये सापडला रबरी बॉल
बीड जिल्हा कारागृहातील सुभेदार बलभीम चिचाणे आणि पोलीस हवालदार अब्दुल वाजेद हे आपल्या नियमित कर्तव्यावर होते. दुपारी साधारणतः ४ वाजताच्या सुमारास बाराक क्रमांक ७ मध्ये असलेला बंदी अक्षय ऊर्फ चिंटू मिठ्ठू गायकवाड हा संशयास्पद हालचाली करत असल्याचं त्यांच्या लक्षात आलं.
त्याची झडती घेतली असता त्याच्या अंडरविअरमध्ये एक फिकट आकाशी रंगाचा रबरी बॉल आढळून आला. तो फोडून पाहिला असता त्यामध्ये गांजासदृश पदार्थ सापडला. तसेच त्याच्या पॅन्टच्या खिशात असलेल्या पुडीमध्ये हिरवट रंगाचा पाला, भुरकट काड्या, बोंडे व बिया सापडल्या.
शिवाजीनगर पोलीस ठाण्यात गुन्हा दाखल .या प्रकरणी दोन शासकीय पंचांच्या उपस्थितीत पंचनामा करून संबंधित मुद्देमाल जप्त करण्यात आला. त्यानंतर अक्षय गायकवाड याच्याविरोधात शिवाजीनगर पोलीस ठाण्यात गुन्हा दाखल करण्यात आला आहे.
व्हीआयपी ट्रीटमेंटनंतर आता गांजाची तस्करी?
या घटनेमुळे बीड जिल्हा कारागृह पुन्हा एकदा प्रश्नाच्या भोवऱ्यात सापडले आहे. काही दिवसांपूर्वी वाल्मीक कराडला तुरुंगात व्हीआयपी सुविधा मिळत असल्याचा आरोप झाला होता. त्यानंतर गँगवॉर आणि आता गांजा तस्करीची घटना समोर आल्याने कारागृह प्रशासनावर संशयाची सुई वळली आहे.
सुरक्षा यंत्रणांवर प्रश्नचिन्ह निर्माण झाले आहे .या घटनेनंतर कारागृहातील सुरक्षा यंत्रणा, तपासणी प्रक्रिया आणि गुप्त माहिती यंत्रणा यांवर गंभीर प्रश्न उपस्थित होत आहेत. तुरुंगासारख्या बंदिस्त ठिकाणी अशा प्रकारचे पदार्थ पोहोचणे ही गंभीर बाब असून, यामागे कोणाचा हात आहे, याचा तपास होणे गरजेचे आहे.